Բյուրեղավան համայնքի սիրելի բնակիչներ Ջերմորեն շնորհավորում եմ բոլորիդ Ամանորի և Սուրբ Ծննդյան տոների առթիվ: Ցանկանում եմ, որ 2019 թվականը լինի խաղաղության, սիրո, տնտեսական վերելքի ու բարեկեցության տարի: Ինչ խոսք, անցնող տարին մեր ժողովրդի համար նշանավորվեց ոչ բռնի թավշյա հեղափոխությամբ: Հեղափողություն, որը կգրվի մեր պատմության էջերում, հեղափոխություն, որով մեր երկիրը թևակոխեց նոր փուլ: Նոր իրողությամբ պայմանավորված՝ երկրում տեղի ունեցան ԱԺ արտահերթ ընտրություններ: Մեր համայնքը ակտիվորեն մասնակցեց և դրսևորեց քաղաքացիական բարձր գիտակցություն: Անցնելով մեր համայնքին՝ նշեմ, որ այս տարի երկու կարևոր, խոշոր ծրագիր՝ պուրակի կառուցումը և մշակույթի տան հիմնանորոգումը, գրեթե հասցրեցինք ավարտին: Տեսանելի աչքով երևում է, թե ինչ աշխատանքներ ենք իրականացրել ծրագրերի շրջանակներում: Երկու փոքրիկ ու հետաքրքիր նախագծեր՝ Մոբիլ մանկապարտեզներ, բացվեցին Նուռնուս և Ջրաբեր բնակավայրերում, որոնք ապահովում են 15 երեխայի նախադպրոցական կրթություն: Իրականացվել են բազմաթիվ ծրագրեր՝ ասֆալտապատման, լուսավորության անցկացման, բակերի կանաչապատման, բարեկարգման աշխատանքներ: Համայնքային իշխանության, ավագանու, համայնքային ենթակայության և համայնքում գործող այլ կազմակերպություննրի արդյունավետ ու բարեխիղճ աշխատանքի շնորհիվ գրանցել ենք լավագույն արդյունքներ. ունենք սամբո- ըմբշամարտի Եվրոպայի առաջնության մասնակից մարզիկներ, ՀՀ չեմպիոններ տարբեր մարզաձևերից՝ սամբո- ըմբշամարտ, ձյուդո, ֆուտբոլ: Արվեստի դպրոցի սաները բոլոր փառատոններից վերադառնում են բարձրագույն պարգևներով: Ամռանը մեկնեցին միջազգային փառատոնի և վերադարձան ԳՐԱՆ ՊՐԻ մրցանակով: Տարվա մասշտաբով տասնյակ սպորտային և մշակութային միջոցառումներ ենք իրականացրել քաղաքում և բնակավայրերում: Այս ամենը կատարվել է Ձեր քաղաքացիական բարձր պատասխանատվության շնորհիվ: 2019 թվականին համայնքապետարանը շարունակելու է հետևողական ջանքեր գործադրել համայնքի յուրաքանչյուր քաղաքացու կյանքի որակի և պայմանների բարելավման ուղղությամբ: Առանձնահատուկ ուզում եմ շնորհավորել մեր հայրենիքի պաշտպաններին, անձնազոհությամբ ու նվիրումով մեր երկրի սահմանները անառիկ պահող զինվորներին ու սպաներին: Կրկին բոլորիս շնորհավորում եմ, մաղթում արդյունավետ և արգասաբեր աշխատանք: Աստված բոլորիս պահապա՛ն: Շնորհավոր Ամանոր և Սուրբ Ծնունդ:

30.12 .18