Կյանքում միշտ երիտասարդ, մշտապես գեղեցիկ սեռի ուշադրության կենտրոնում, հետաքրքիր զրուցակից ու մեծատառով մարդ, արվեստագետ ու արվեստասեր Էդուարդ Ասատրյանն արդեն 80 տարեկան է: Մեր հերոսը ՝ Էդուարդ Անուշավանի Ասատրյան: Ծնվել է 1937թ-ի սեպտեմբերի 10-ին արհեստների ու արվեստների քաղաք Լենինականում: Մեծացել է զինվորականի ընտանիքում: Սովորել և ավարտել է Ս. Օրջոնիկիձեի անվան ռուսական դպրոցը: Երեխա ժամանակ ակտիվ մասնակցել է միջոցառումներին, սեփական նախաձեռնությամբ կազմակերպել է ճամբարներ: Ինքնուս երաժիշտը 13 տարեկանում սովորել է նվագել ակկորդեոն, որը հայրը բերել էր Գերմանիայից: Իր կյանքի անմոռանալի օրն էր, երբ հորից նվեր ստացավ երաժշտական գործիքը: Այդ գործիքով աշխատել է թատրոններում. <<Նվագել եմ <<Սրտի արատ>> ներկայացման մեջ: Հանդիսատեսի ջերմ ծափահարությունը դեռ ականջներումս է: Իմ առաջին աշխատավարձը ստացա այդ ժամանակ՝ 64 ռուբլի ու գնեցի հեծանիվ>>- իր հուշերով կիսվում է մեզ հետ Է. Ասատրյանը: 1955թ-ին ընդունվում է Երևանի անասնաբուծական-անասնաբուժական ինստիտուտ: 1 տարի սովորելուց հետո թողնում է սովորելը և բռնում երաժշտության ուղին: Լենինականի Կարա Մուրզայի անվան երաժշտական դպրոցում անցնում է կոնտրաբասի կուրսեր: 1960թ-ին տեղափոխվում է Երևան և ընդունվում Երևանի պետական կոնսերվատորիա՝ կոնտրաբասի բաժին: Ավարտելուց հետո անցնում է աշխատանքի Հայաստանի ռադիոյի և հեռուստատեսության պետական սիմֆոնիկ նվագախմբում՝ աշխարհահռչակ երաժիշտ Օհան Դուրյանի ղեկավարությամբ: Աշխատելու տարիներին կրկին ընդունվում է կոնսերվատորիա և ստանում երաժշտագետի մասնագիտություն: Զբաղվել է ժողովրդական երգերի հավաքագրությամբ, հիմնականում Շիրակի դաշտավայրի գեղջկական երգերի: Աշխատել է պետական տարբեր նվագախմբերում: Նվագում է տարբեր երաժշտական գործիքներ, դասականից մինչև ժողովրդական: Պատմում է, թե ինչպես եկավ Բյուրեղավան և ինչպես ընդունվեց բյուրեղավանցի հասարակության կողմից.<< Տարիներ առաջ տղաս Նուռնուսում ամառանոց գնեց: Ես շատ եմ սիրում բնություն և հաճախ գալիս էի այդտեղ հանգստանալու և երբեմն ակկորդեոն նվագելու: Մի հարևան ունեինք, ուստա Հովիկ էին ասում: Մի օր Հովիկը ինձ ասում է, որ Բյուրեղավանի երաժշտական դպրոցում աշխատանքի տեղ կա: Արի, իմ տղային էլ շվի նվագել կսովորեցնես: Գալիս եմ Բյուրեղավանի երաժշտական դպրոց: Դա 2005 թվականն էր: Էն ժամանակ տնօրենը Սիլվա Սերգեևնան էր: Մոտենում եմ իրեն ու ասում, որ կարող եմ տարբեր գործիքներ դասավանդել: Նա ինձ առաջարկում է բացել դհոլի դասարան: 2 աշակերտով սկսում եմ պարապմունքները: Շատ գոհ եմ, տարեցտարի սաներիս թիվն ավելանում է: Հրաշալի կոլեկտիվում եմ աշխատում: Սիրով եմ գալիս աշխատանքի: Բյուրեղավան քաղաքն իմ մոտ ասոցացվում է բյուրեղ հասկացության հետ: Մաքուր է, ծառազարդ, ժողովուրդը հարգալից է: Կամաց-կամաց ծանոթացա քաղաքի ղեկավարության հետ: Քաղաքապետը շատ հաղորդակցվող, բանիմաց մարդ է, ինձ շատ հաճելի է նրա հետ շփվել, աշխատել: Այնպես ստացվեց, որ ես այստեղ դարձա 80 տարեկան: Իմ կոլեկտիվն ինձ հրաշալի անակնկալ մատուցեց, որ ես երբեք չեմ մոռանա: Շատ շոյված ու շնորհակալ եմ Հակոբ Սուրենիչի ուշադրությունից, որ գնահատեց իմ աշխատանքը>>: Ծննդյան 80 ամյակի առիթով Բյուրեղավան համայնքի ղեկավար Հակոբ Բալասյանը՝ Բյուրեղավան համայնքում մատաղ սերնդի, երաժշտական կրթության, գեղագիտական դաստիարակության գործում ներդրած մեծ ավանդի և մանկավարժական բազմամյա գործունեության համար Էդուարդ Ասատրյանին խրախուսել պատվոգրով և դրամական պարգևով: Միշտ երիտասարդ, ավյունով լեցուն երաժիշտը շարունակում է աշխատել և սերունդներ կրթել:
22.09.17 |