Բյուրեղավանի «Արև» մանկապարտեզը փայլում է իր մաքրությամբ, սանիտարահիգիենիկ պայմանների մասին խոսք անգամ լինել չի կարող: Այս փաստին անդրադարձել ենք բազմիցս: Այստեղ ամեն օր երեխաների համար պատրաստում են համեղ ու առողջարար կերակրատեսակներ: Մանկապարտեզը հանրապետությունում՝ լավագույնների շարքում է: Ինչ խոսք, մանկապարտեզում որևէ վարակ չէր կարող հայտնաբերվել: Այն կրթօջախ մուտք գործեց ծնողների որոշակի անտարբերություն հետևանքով և մեկ երեխայից արագ փոխանցվեց մի քանիսին: Երեխաներից ոմանց տեղափոխեցին համապատասխան բժշկական կենտրոններ: Քաղաքապետ Հակոբ Բալասյանն իր վրա վերցրեց այս խնդրի անմիջական վերահսկողությունը: Մանկապարտեզ վարակ բերող երեխայի մոտ նկատվել էր փսխում, փորլուծություն: Դաստիարակ ընկեր Քնարիկը զանգահարել էր փոքրիկի մայրիկին և երեխային անմիջապես տուն էին ուղարկել: Այդ ժամանակահատվածում մի քանի փոքրիկի մոտ ևս նույն երևույթներն են նկատվել: Մանկապարտեզի տնօրեն Էլինա Հայրապետյանը ներկայացնելով իրավիճակը պատմեց, որ բոլոր համապատասխան օղակներից՝ գյուղատնտեսության նախարարության սննդամթերքի անվտանգության պետական ծառայությունից, ԱՆ պետական հիգիենիկ և հակահամաճարակային տեսչության Կոտայքի մարզային կենտրոնից, եկել են և նմուշներ վերցրել: Մի քանի օր ուժեղացված հսկողություն է իրականացվել մանկապարտեզում: Սուր աղիքային վարակիչ հիվանդությունների կապակցությամբ իրականացվել են կարանտինային հակահամաճարակային միջոցառումներ, որպեսզի աղբյուրը արագ հայտնաբերվի: Առողջապահության նախարարության ՊՀՀՏ Կոտայքի մարզային կենտրոնի հետազոտությունների արդյունքում պարզվել է, որ Բյուրեղավանի «Արև» մանկապարտեզում բռնկված աղիքային վարակի դեպքերից հիվանդների մոտ հայտնաբերվել է դիզենտերիայի հարուցիչ /shigella sonnei տեսակի/: Մանկապարտեզում կատարված բոլոր նշառումներից, պաթոլոգիական միկրոբներ չեն հայտնաբերվել: Նշառումներ կատարվել են նաև հիվանդների բնակության վայրերից և խմելու ջրից, որոնցում ևս միկրոբներ չեն հայտնաբերվել: Այստեղից կարելի է եզրակացնել, որ ինֆեկցիան տարածվել է բացիլակիր անձի կամ անձանց միջոցով: Քաղաքապետարանի և Բյուրեղավանի քաղաքային պոլիկլինիկայի հետևողական և սկզբունքային աշխատանքների շնորհիվ լուրջ հետևանքներ չարձանագրվեցին։

30.11.15.