Բյուրեղավան քաղաքի աղբահանության և սանիտարական մաքրման աշխատանքները կատարում է համայնքի «Բարեկարգում և կանաչապատում» ՀՈԱԿ-ը: Կազմակերպությունը, որը գտնվում է քաղաքապետարանի ենթակայության տակ, ունի 17-ից ավել տեխնիկական աշխատող և 1 «Զիլ» մակնիշի աղբատար մեքենա, որոնցով իրականացվում են աշխատանքները: Բյուրեղավան քաղաքի սանիտարական մաքրման աշխատանքների ծավալն օրական կազմում է 80.000քմ: Կազմակերպության նորանշանակ տնօրեն Հայկ Եղյանը` աշխատանքային գործունեության 5 ամիսների ընթացքում, քաղաքապետ Հակոբ Բալասյանի հանձնարարականով կատարել է տեսանելի շատ աշխատանքներ: Նշանակվելուց անմիջապես հետո, նրա առաջին գործը եղել է ծերացած բարդիների հատելը: Կտրել են 10-ից ավել ծառեր, որոնք իրենցից վտանգ էին ներկայացնում: «Շուտով 5 մեծահասակ բարդի ևս կոչնչանա»,- ասում է տնօրենը և հավելում, որ նրանք փոխարինվելու են նորերով: Ցրտաշունչ ձմեռը մնաց անցյալում, իսկ դրանից կուտակված աղբը դարձավ տեսանելի: Այս օրերին մեծ թափով, սեզոնային աշխատողների միջոցով, քաղաքում կատարվում են սանմաքրման աշխատանքներ՝ բոլոր փողոցները, շենքերի բակերը մաքրվում ու կարգի են բերվում: Շաբաթօրյակի տեսքով, ապրիլի 6-ին Բյուրեղավանի Ոստիկանության բաժանմունքը և ավագ դպրոցն ամբողջովին մաքրել են իրենց տարածքները և տնկել ծառեր, որը հատկացրել էր կազմակերպությունը: Ամեն տարի քաղաքապետարանի բյուջեյից սանմաքրման աշխատանքները կազմակերպելու համար հատկացվում է 34 մլն դրամ: Համայնքի ղեկավարի այս տարվա կարևոր ու առաջնային խնդիրներից է՝ լուծել շենքերի բակերում կարուսելների տեղադրման և նորակառույց մանկապարտեզի տարածքի կանաչապատման հարցերը: Հայկ Եղյանը byureghavan. am-ին տեղեկացրեց, որ արդեն տնկել են 50 դեկորատիվ ծառ՝ հացենի, կաղնի, բոխի և առաջիկայում պատրաստվում են՝ 250-ը ևս տնկել: Տնկել են նաև պտղատու ծառեր՝ 23, 27, 28, 33 շենքերի բակում: Շուտով քաղաքի զբոսայգին գեղեցիկ ծաղիկներով ու թփերով կանաչապատվելու է: Կազմակերպությունն ամենօրյա հսկողություն է իրականացնում քաղաքի փողոցների, մայթերի, այգիների և բակային տարածքների մաքրությունն ապահովելու ուղղությամբ, իսկ առաջիկայում սպասվում է քաղաքային շաբաթօրյակ:

10.04.13.