Արցախյան ազատամարտի մասնակից Բարիս Ղարսայանի և Արմեն Աբրահամյանի անվանական զրուցարանը տեղադրվեց Բյուրեղավանի 27, 28 շենքերի բակում, որտեղ տարիներ առաջ ապրել են մեր հերոսները: Այդ առիթով համայնքապետարանը կազմակերպել էր հուշ-ցերեկույթ՝ նվիրված ազատամարտիկներին, որոնք զոհվեցին ու իրենց կյանքը նվիրեցին հայրենիքին: Մասնակցում էին բակի բնակիչներ, Ղարսայան, Աբրահամյան ընտանիքների անդամներ, բյուրեղավանցիների կողմից շատ սիրելի մանկավարժ Ջուլիետա Ասատրյանը, ներկայացուցիչներ համայնքապետարանից՝ համայնքի ղեկավարի գլխավորությամբ: Նախաձեռնության հեղինակ Հակոբ Բալասյանը վստահ է, որ այս տարածքը բակում կդառնա հայրենասիրության փոքրիկ անկյուն. «Այս փոքրիկ զրուցարանը, , որն իր մեջ կրում է նաև դաստիարակչական բնույթ, առիթ է մատաղ սերնդին փոխանցելու հիշողություններ՝ Արմենի և Բարիսի մասին: Համոզված եմ, որ շատ խնամքով կպահպանեք նրանց վառ հիշատակը, և երկար զրույցներ կլինեն նրանց կյանքի ու սխրանքների մասին»: Ջուլիետա Ասատրյանը՝ հուզված ու խորը թախիծով, հիշեց իր աշակերտին՝ Արմենին, ու բոլոր բյուրեղավանցի արծիվներին՝ նշելով, որ նրանք գնացել են «Մահ իմացեալի ճամփով»… «Մահ իմացեալ՝ անմահություն» խորագրի ներքո ներկայացվեց տղաների անցած ուղին: Գեղարվեստական մասն ապահովեց «Բյուրեղավանի Շառլ Ազնավուրի անվան արվեստի դպրոցը» , տաղանդավոր Միքայել Խաչատրյանը և «Անի-Դենս» պարի ստուդիան:/p>

08.11.19