Բարի ու գեղեցիկ Աքսենյա տատն այսօր տոնում է իր ծննդյան 100 ամյակը: Ամենքին չէ, որ բախտ է վիճակվում ապրել 1 դար: Աքսենյա Հովհաննիսյանի տարեդարձի առիթով Բյուրեղավան համայնքի ղեկավար Հակոբ Բալասյանն իր նախաձեռնությամբ, համայնքապետարանի աշխատակիցների հետ այցելել էր Հովհանիսյանների ընտանիք՝ անձամբ շնորհավորելու 100-ամյա հոբելյարին: Համայնքի ղեկավարին Աքսենյա տատն ընդունեց ուրախությամբ և շնորհակալության մեծ զգացումով. «Հակոբ ջան, շատ ապրես, որ հիշել ես ինձ: Սրտանց եմ ասում, շատ շնորհակալ եմ»: Հյուրերն ընտանիքի հետ սեղան նստեցին և շնորհավորական խոսքեր հղեցին օրվա հերոսին: Տատի և Հակոբ Բալասյանի զրույցն անցավ ջերմ ու սրտաբուխ մթնոլորտում: Աքսենյա տատը դրվագներ պատմեց իր կյանքի անցած ու գնացած օրերից, շատ բաներ մոռանալով, հետո հիշելով. «Դե տարիքն է մեղավոր, ինչ անեմ»-մեղմ ժպիտով ասում էր նա: Համայնքի ղեկավարը նվերը հանձնելով համեստ, բարի աչքերով Աքսենյա տատին, շնորհավորեց նրան, մաղթեց առողջություն, երկարակեցություն. «Մայրիկ ջան, դու երջանիկ ես, որ ունես էսպիսի լավ գերդաստան: Պետք է ուրախ լինես, որովհետև շրջապատված ես նրանց սիրով: Քեզ ամենալավն ու բարին եմ ցանկանում»: Հոբելյարը, որպես նվեր ստացավ դրամական պարգև: Տատի ամենամեծ երազանքն է՝ մեր երկիրը տեսնել խաղաղ: Հենց այս երազանքը պահեց ու փչեց տոնական տորթի մոմերը: Աքսենյա Հովհաննիսյանը ծնվել է 1918թ. մայիսի 5-ին Ախալքալակի շրջանի Ազարվեթ գյուղում: Ունեցել է դժվարություններով լի մանկություն: Ծնողները նրան ամուսնացրել են 14 տարեկանում: Երբ սկսվել է Հայրենական մեծ պատերազմը ամուսինը մեկնել է բանակ և չի վերադարձել: Պատերազմի տարիներին աշխատել է թիկունքում, հաղթահարելով իր առջև ծառացած բոլոր դժվարությունները: 1945-ին նա կյանքը կապում է Նորիկ Հովհաննիսյանի հետ, համատեղ կյանքում ունենում են 7 երեխա: Մինչև Բյուրեղավան տեղափոխվելը նրանց ընտանիքը ապրել է նախկին Սովետական Միության տարբեր քաղաքներում: 1965-ից մինչ օրս ապրում են Բյուրեղավանում: Աքսենյա տատի հոգսերը փոքր-ինչ թեթևացել են, երբ զավակները հասունացել են, աշխատել, ամուսնացել: Նրանք արդեն թոռնատեր ու ծոռնատեր են: Իրենց մորն էլ երեխայի պես են խնամում: Ամուսինը մահացել է 1989թ-ին: 7 երեխա, 18 թոռ, 39 ծոռ, 4 կոռ: Նրանք են իր կյանքի ամենամեծ ձեռքբերումն ու հարստությունները: Մեկ դար ապրած Աքսենյա տատին մաղթում ենք երկարակեցություն, առողջություն և արևշատություն:

06.05.18