Վերջերս ՀՀ Առողջապահության նախարարության կողմից ընդունված բարեփոխումների ծրագիրը հանրության շրջանում ընկալվեց  տարբեր կերպ:  Այս կարևոր հարցի և Բյուրեղավանի պոլիկլինիկան նեղ մասնագետներով համալրման  հարցերի շուրջ խոսեցինք  «Բյուրեղավանի քաղաքային պոլիկլինիկա» ՓԲԸ-ի տնօրեն Միքայել Միքայելյանի հետ:

-Պարոն Միքայելյան, մարտի 1-ից ուժի մեջ  մտավ «Դեղերի կարգավորման մասին» օրենքը, որով կարգավորվում է դեղերի շրջանառությունը Հայաստանում: ՀՀ առողջապահության նախարար Լևոն Ալթունյանը հայտարարել էր,  որ 4500 դեղամիջոցից 2500-ը բաց կթողնվեն դեղատոմսերով, մնացած 2000-ի վաճառքն ազատ կլինի: Այս հարցը մեծ արձագանք գտավ հանրության շրջանում: Ի՞նչ կասեք՝  արձագանքը Բյուրեղավանում ինչպիսի՞ն էր:

Մ. Միքայելյան- Նախ ասեմ, որ դեղատոմսով դեղ դուրս գրելը մեր երկրում շատ վաղուց է իրականացվում: Դա քաղաքակիրթ մոտեցում է և շատ երկրներում է օգտագործվում: Այո՛, դա ճիշտ որոշում էր, քանի որ դեղը բուժական միջոց է և դրա ինքնուրույն օգտագործումը  կարող է հանգեցնել տարբեր  բարդությունների: Առանց բժշկի հսկողության դեղերի օգտագործումն անընդունելի է: Վստահեցնում եմ Ձեզ՝ մարտի 1-ից մինչ օրս,  մեզ մոտ արտառոց  խնդիրներ չեն առաջացել: Բժիշկները  բուժառուների հետ աշխատել են կանոնակարգված, առանց ավելորդ դժգոհությունների: Իմ հանձնարարությամբ բժիշկներին  բաժանվել են  դեղատոմսերի բլանկները՝ անկյունային շտամպով: Իզուր է մեր ազգաբնակչությունը խուճապի մատնվել: Վստահեցնում եմ, որ այս ծրագիրը կաշխատի, դրանում ոչ մի խոսք: Դեղը կոնֆետ չի, որ կիլոգրամով գնեն, այն բուժական միջոց է, որը պետք է նշանակվի բժշկի կողմից: Ծրագիրը գործարկվում  է փուլ առ փուլ:

-Էլեկտրոնային առողջապահական համակարգի ներդրումով, որքանո՞վ պաշտպանված կլինի քաղաքացու անձնական տվյալները: Գործընթացն արդեն սկսվել է, մեր համաքաղաքացիներն ինչպե՞ս են վերաբերում այդ հարցին:

Միքայել Միքայելյան- Էեկտրոնային առողջապահական համակարգում քաղաքացու անձնական տվյալները հուսալիորեն պաշտպանված են։ Համակարգ մուտք գործելու հասանելիություն ունի միայն քաղաքացին և իր բժիշկը` այն էլ պացիենտի համաձայնությամբ։ Միաժամանակ, մուտքի բոլոր դեպքերը համակարգում գրանցվում և պահպանվում են, և քաղաքացին իր անձնական էջից կարող է վերահսկել դրանք։ Մինչև հիմա հիվանդանոցում գրվում էր պացիենտի հիվանդության պատմագիրը, հիմա այն շարունակվելու է նաև էլեկտրոնային տարբերակով: Չեմ կարծում, որ այս համակարգը ներդնելով մենք ոտնահարում ենք մարդու իրավունքները:

-«Բյուրեղավանի քաղաքային պոլիկլինիկա» ՓԲԸ-ում նեղ մասնագետներ չլինելու պատճառով տվյալ կաբինետները չէին գործում: Ի ուրախություն մեզ, կաբինետներն այսօր գործում են և համապատասխան մասնագետները  շաբաթվա տարբեր օրերին սպասարկում են հիվանդներին:

Միքայել Միքայելյան - Նոր կաբինետները վերաբացելով կարողացանք բավարարել մեր ազգաբնակչության պահանջները:  Պոլիկլինիկան համալրվել է նոր բժիշկներով՝ քիթ-կոկորդ, ակնաբույժ,  գինեկոլոգ, էնդոկրինոլոգ, վիրաբույժ: Կարիք կա միայն բժիշկ- նյարդաբանի: Մասնագետները փորձառու են: Այսօրվանից մեզ մոտ աշխատանքի է անցել մանկաբարձ- գինեկոլոգ Կարինե Սարգսյանը: Բավականին փորձառու բժշկուհի է,  38 տարի աշխատում է այս ոլորտում:  Մեծ հույսեր ենք կապում նրա հետ: Կարծում եմ, որ  մանկաբարձ- գինեկոլոգի ծառայությունը մեր համայնքում  առաջընթաց կապրի և  հղիների հոսք կունենանք: Կազմակերպչական առումով մենք  դեռ անելիքներ ունենք:  Նպատակ կա մինչև տարեվերջ ընդհանուր գործիքային հետազոտություններն ամբողջ ծավալով կազմակերպել տեղում, որպեսզի մեր հղին ստիպված չլինի այցելել  այլ բժշկական հաստատություն: Մեր համայնքի բնակիչները գոհ են քիթ - կոկորդի  և  էնդոկրինոլոգի ծառայություններից: Բժիշկների աշխատանքային  օրերին  կաբինետների դիմաց կուտակումներ են լինում, աշխատում են ծանրաբեռնված: Կարևորը՝  բուժառուների մոտ վստահություն կա: Նույնը կարող եմ ասել մյուս մասնագետների  մասին:  Վճարովի ծառայությունների համար  ընդլայնելու տեղ  ունենք և հնարավորության դեպքում ծավալը մեծացնելու ենք: Կա սահմանված ծառայություններ և  գնացուցակ, որից կարող են օգտվել ցանկացողները:

22.03.18