Բյուրեղավանի արվեստի դպրոցում մեծարեցին վաստակաշատ մանկավարժ, երկար տարիներ արվեստի դպրոցի ղեկավար Սիլվա Մուկոյանին: Նշվեց նրա մանկավարժական գործունեության 50 ամյակը: Օրվա հոբելյարն իր աշխատանքային գործունեության տարիներին մեծ ներդրում է ունեցել Բյուրեղավանի կրթամշակութային կյանքում: Բյուրեղավանցի շատ երեխաներ ու պատանիներ գեղագիտական դաստիարակություն ստացել են հենց Սիլվա Մուկոյանից: Նրանցից ոմանց ուղորդել է դեպի բարձրաճաշակ երաժշտություն: Նրա առաքելությունը մեծ է եղել արվեստի դպրոցի կայացման գործում: Գնահատելով նրա 29 տարվա աշխատանքը Բյուրեղավանում, արվեստի դպրոցի կոլեկտիվը՝ տնօրեն Նարինե Զաքարյանի գլխավորությամբ և քաղաքապետ Հակոբ Բալասյանի աջակցությամբ անակնկալ պարգևեցին շատ սիրելի Սիլվա Սերգեևնային: Մեծարման երեկոն անցավ ջերմ ու հաճելի մթնոլորտում, հնչեցին սրտառուչ խոսքեր ու կատարումներ թե՛ դպրոցի կոլեկտիվի, թե՛ սաների կողմից: Միջոցառման պատվավոր հյուրն էր քաղաքապետ Հակոբ Բալասյանը, ով տարիներ շարունակ աշխատել է տիկին Մուկոյանի հետ, հիացել նրա «երաժշտական» մարդ լինելու կարողությամբ: «Շնորհավորում եմ Ձեզ աշխատանքային գործունեության 50 ամյակի առիթով: Դուք մեծ ներդրում եք ունեցել մատաղ սերնդի գեղագիտական դաստիարակության գործում, դրա վառ ապացույցն այն է, որ մեր շատ շրջանավարտներ շարունակում են կրթությունը բարձրագույն երաժշտական ուսումնական հաստատություններում: Տարեցտարի ավելանում է դպրոց հաճախող երեխաների թիվը և բացվում են նոր խմբեր: Հարգելի Սիլվա Սերգեևնա, Ձեզ մաղթում եմ առողջություն, հաջողություններ»- իր խոսքում ասաց քաղաքապետը: Երկարամյա բարեխիղճ աշխատանքի համար քաղաքապետը Սիլվա Մուկոյանին հանձնեց պատվոգիր: Նրա աշխատանքը գնահատված է, բոլորի սիրելի Սիլվա Սերգեևնան հուզվել է. «Շնորհակալ եմ ինձ նման տոն պարգևելու համար: Շնորհակալ եմ իմ գործընկերներին և Ձեզ հատկապես, պարոն քաղաքապետ: Շատ հուզված եմ, ամեն ինչ կազմակերպված էր հրաշալի, Նարինե ջան: Շնորհակալ եմ բոլոր ներկաներին: Այսօր իմ կյանքի ամենահիշարժան օրն է»: Միջոցառման ընթացքում արվեստի դպրոցի նկարչական խմբակի դասատուներ Գոռ Աբրահամյանն ու Նարեկ Թովմասյանը մատիտով թղթին հանձնեցին հոբելյարի դիմանկարը: Մեծարման երեկոյի ավարտին դպրոցի երգչախումբը կատարեց Խաչատուր Ավետիսյանի «Երևանի ջուրը» ստեղծագործությունը, որի խոսքերը գրվել էր կոլեկտիվի կողմից և ձոնվել սիրելի ուսուցչուհուն: Չնայած աշխատանքային գործունեության երկար տարիներին, Սիլվա Սերգեևնան շարունակում է աշխատել և կրթել սերունդներ:

13.10.15.